GIDASIG sa Visayan Electric Company ang mga konsumedor nga mobubo og puhonan sa solar power generation nga makatabang og dako sa nagkanipis nga supply sa kuryente sa Sugbo.
Atol sa Cebu Unplugged: Energy Forum sa SM Cebu sa niaging adlaw nga gipasiugdahan sa Veco, si Sebastian Lacson, chief operating officer sa Veco, niingon nga ang usa ka konsumedor mahimong mo-invest sa solar energy pinaagi sa pagbutang og solar panels ug converter nga maoy mo-convert sa enerhiya gikan sa adlaw.
Sa ingon niini nga paagi, ang usa ka panimalay mahimong producer og power sa maximum limit nga 1,000 watts diin ang kuryente nga wa magamit ma-konektar sa grid ug magamit sa ubang mga konsumedor. Matod niya ang Veco nakigtambayayong sa Solar Enfinity sa Europe nga maoy mo-instalar sa mga solar panels sa atop sa panimay sa konsumedor. Aduna kini warranty nga 10 ka tuig.
Ang solar package nagkantidad og P250,000.
Si Lacson nagkanayon nga sud sa pito ngadto sa walo ka tuig, mabawi ang kantidad.
“It’s a very good return of investment,” dason niya atol sa forum.
Moabot sa 175 ka mga partisipante ang niapil sa forum nga gipahigayon sa conference hall sa SM Cebu.
Si Energy Undersecretary Raul Aguilosm usa sa mga namulong sa forum, namahayag nga gihangop nila ang gihimong mga pamaagi sa Veco aron makadaginot og kuryente pinaagi sa Interruptible Load Program ug sa bag-ong gipailaila nga solar power generation.
Sila nidasig sa ubang mga power distributor nga mosagop ug mopatuman sa ILP sa Veco.
Suma pa niya ang ILP nga gisugdan pagpatuman dinhi sa Sugbo ang gipatuman usab sa Manila ug sa Mindanao diin nagnihit og maayo ang supply sa kuryente.
Ang undersecretary nipasabot nga dako og matabang ang ILP tungod kay mapugngan ang brownout gumikan kay maibanan ang konsumo sa kuryente sa grid sanglit ang dagkong mga kompaniya mogamit sa ilang kaugalingong generator sets. (SCG)