MASALIGON si Filipino “Marvelous” Marvin Sonsona nga iyang mabawsan si Puerto Rican Wilfredo Vazquez Jr. sa ilang rematch karong adlawa sa Madison Square Garden sa Las Vegas, USA.

Ang away nahilakip sa undercard sa panagharong nila ni Puerto Rican Miguel Cotto ug Argentine Sergio Martinez.

Sa ilang giabibahan nga face-off kagahapon, gisultihan ni Sonsona si Vazquez og “now it’s my time.”

Sa premiro nilang away niadtong 2010, napilde si Sonsona pinaagi sa 4th round knockout sa ilang world super bantamweight title fight.

Ang duha ka mga boksidor parehong ningtimbang og 125.8 pounds sa official weigh-in.

“My condition is one thousand percent. I will give it everything. I will put on a show,” matod pa ni Sonsona sa usa ka interbyu nga migawas sa www.philboxing.com

Gikan sa iyang ka­pildihan batok kang Vazquez, si Sonsona nakakulit og upat ka sunod­sunod nga kadaugan lakip na niini ang impresibong 3rd round knockout batok sa kanhi world super bantamweight champion Akifumi Shimoda sa Japan.

Ang promoter ni Sonsona nga si Sammy Gelloani mibutyag nga dili bastabasta ang preparasyon sa lumad nga taga General Santos City hinungdan nga dako ang pagsalig niini. (ESL)