NASIKPAW sa kapulisan ang usa ka lalaking suspek sa kasong pagpatay basi sa gahum sa warrant of arrest nga gipagula sa Regional Trial Court Branch 20 sa siyudad sa Digos.

Ang suspek nga si Alexander Tabalayan, 32, minyo ug nagpuyo sa Sityo Malagsom, Barangay Buhangin, lungsod sa Malita, Davao del Sur, nasikop sa iyang puluy-anan banda alas 3:30 sa hapon niadtong Martes.

Si Chief Inspector Samson Kimayong, hepe sa kapulisan, nagbutyag nga ang dinakpan, nag-atubang og kasong murder nga nakadoket sa criminal case number 201 (2010).

Gimando ni Judge Albert Axalan sa RTC Branch 20 ang pagsikop sa suspek, segun ni Kimayong.

Gibutyag ni Kimayong nga nagtingkagol na sa selda sa Malita Police Station ang suspek sanglit way girekomendang piyansa ang korte alang sa iyang temporaryong kagawasan. (Dondon Dinoy)