NAG-ATUBANG og kasong kreminal ang tag-iyag travel agency uban ang iyang duha ka mga kauban tungod sa giingong nailad sa ilang pagpanarbaho ngadto sa nasod sa Trinidad and Tobago.
Kasong illegal recruitment by syndicate ang gipasaka nila ni Regine Nellas ug Therese Marie Bas batok kanilang Maria Perpetua Baldemor, tag-iya sa Blue Pearl and Tours uban sa iyang mga kauban nga silang Leah Rama ug Imelda Calunsag.
Kini nahitabo niadtong Oktubre 2006.
rNirekomendar ang Cebu City Prosecutor's Office nga di makapiyansa sila si Baldemor ug kaubanan ning kaso nga ilang giatubang.
Kining kasoha tungod sa giingong pagpang-rekrut ni Baldemor alang sa panarbaho sa Trinidad and Tobago diin ilang narekrut si Bas isip housekeeper.
Si Nellas nahibawo sa naasoy nga panarbaho sa Trinidad and Tobago ug sa travel agency sa JY Square Mall nga nahimutang sa Lahug, dakbayan sa Sugbo.
Ang duha ka mga biktima ningsunod sa proseso nga maoy gipahimo sa mga nagrekrut.
Sila nibayad og 500 dolyares alang sa paghikay sa ilang mga papeles uban sa pasalig nga makatrabaho gyod sila sa gawas unya mahibalik ra ang ilang nagasto sa higayon nga aduna na silay trabaho.
Dihang nakabayad na silag 2,600 dolyares gipapirma na sila og "employment contract."
Apan ang ilang "employer" mao ang Prime Global Inc. nga gipanag-iya ni Rama apan ang address niini sa New York sa Estados Unidos.
Niadtong Disyembre 21, 2006, ang mga biktima uban sa laing 16 ka mga tawo nakalarga gyod sa Tobago, West Indies apan ang suweldo nga gidawat wa natuman sumala sa nalatid sa ilang kontrata.
Si Rama niadto sa ilang gitrabahuan sa Tobago ug giingnan nga dawaton na lang ang ilang gidangatan.
Niabot ang Disyembre 2007, natapos ang ilang mga kontrata sa ilang gitrabahuan.
Apan di sila makabalik sa Pilipinas kay di nila makaya ang pagpalit og tiket sa ayroplano. Ang ilang kinitaan kuwang ra sa ilang gastuhan.
Si Bas nauli sa Pilipinas niadtong May 2008 pinaagi sa tabang sa iyang pamilya samtang si Nellas uban sa grupo ni Engr. Jacqueline Fortuna gipadakop sa "immigration authorities" apan nakauli pinaagi sa tabang sa Philippine Consul sa Trinidad and Tobago ug kagamhanan sa lalawigan sa Sugbo.
Silang Baldemor ug kaubanan ninghimakak sa pasangil nga gibato kanila.
Nisaysay si Baldemor nga ang iyang agency way labot sa pagpangrekrut nilang Bas ug Nellas kay gigamit ra ang ilang agency aron magkaabot ang mga interesado nga aplikante aron maestoryahan ni Calunsag.
Sa iyang bahin, si Calunsag namahayag nga ang ilang kalambigitan mao lang ang paghatag sa ilang sakyanan aron makaadto sila sa Trinidad and Tobago.
Bisan niini, ang piskaliya nakakitag bug-at nga rason nga nagtumbok nga sila si Baldemor ug kaubanan ninglapas gyod sa balaod busa gipasaka ning kaso sa korte.