SUKAD ato naguol na ko. Nagsige na ko og hunahuna niya. Dili na ko ka concentrate sa akong trabaho. Nagsige na ko og absent.
Dili na ko mo overtime. Sa laktod pagkasulti naapiktuhan gyud akong trabaho. Hasta akong kauban sa linya nakontrahan ko sa ako nga kauban kay lagi di na ko mo overtime. Unya magsige og absent, permi makuwangan ang tawo sa linya.
Magsige ko og hilak kada gabii. Maghinuktok ko sa trabahoan ug masulob-on nako permi, kay magbalikbalik sa akong huna-huna ang iyang gibuhat nako kay ako man gyud ang pangagpas buntis ko ato nga time nga iya kong gipainom adtong gihatag niya nga tablitas ug capsule. Naguol kaayo ko kay nakuha man. Mao man gyod ang akong pangagpas.
Dugay kaayo ko ka naka-recover. Pila na ka buwan ug mga tuig nagsige ko og hilak halos kada gabii. Na-depressed ko.
Hangtod nasakit dayon ko. Di na ko mokaon sa sakto nga oras ug wala na koy tarong nga tulog kay magsige og hilak ug magsige og huna-huna niya kay first time pa gyod nako siyang uyab.
Sakit gyud kaayo kay kabuhion ko permi kay magutman ko permi.
Wala may lami ikaon kay magsige ko og hilak. Nagpa doctor gyud ko og psychologist sa 2007,2008 hangtod early 2009. Nag-maintain ko og tambal.
Akong pangutana nganong mag sige naman siya og balik sa akong hunahuna nga wala na man ko mag handom niya. Wala na pod ko naghuna-huna, magkita mi og usab ug mag balik. Unsa angay nakong buhaton? Nagmahay ba siya sa iyang nabuhat nako nga iyang mahibaw-an sa nahitabo nako? Salamat, Papa Joe, Palihug tambagi ko.
CHINITTA
Day Chinitta,
Maayong adlaw kanimo no? Day you must accept the fact nga wala na siya and accept sad nga you are also at fault ato kay sa rason nimo nga nisugot ka nga makighilawas niya kay gusto na ka nga makaanak. Kon buot sabton sayo ra kaayo, Day, oi nahatag nimo imong self sa tawo nga wala gani nimo mailhi kon kinsa gyud, taga asa ba basta kay nagpadala ka sa bul-og sa gugma.
Ang nahitabo nimo kay nagbilin kini og trauma sa imong kinabuhi kay gawas nga siya ang first time nimo, kahibaw gyud ka nga atong higayuna isip instinct sa usa ka babaye nga mabdos ka ato.
Gawas pa nga ambungan pa gyud siya, maora bag jackpot sad, pero nabiktima ka sa tawo nga tampalasan. Pero at least wala nimo tuyua nga magpalaglag kay basin nagtuo ra sad ka ato nga tambal sa imong sakit. Ako pa nimo ron mao ang pag ampo sa kahitas-an ug magmatngon sa dinaliang pag-ila-ila sa mga lalake.
Walay kumo magkinaraan ang style basta di lang mahisukamod.
Moabot ra gihapon ang tawo nga molipay nimo. Pangayoa lang lang na sa Ginuo. Daghang salamat.
PAPA JOE