USA ka lalaking hubog nga nagmaoy natigbasan sa iyang silingan didto sa Barangay Libuton, lungsod sa Laak, Comval Province, Lunes sa gabii.

Nailhan ang biktima nga mao si Junjun Milagrosa, 35, molupyo sa susamang barangay, samtang ang suspek mao ang iyang silingan nga si Richard Solitario, 22, ulitawo ug usa ka mag-uuma.

Sa report gikan sa Comval Police Provincial Office, nasayran nga nahitabo ang pagpanigbas pasado alas 8:00 sa gabii sa dihang giingong nagmaoy si Milagrosa didto sa iyang balay nga naatulan nga miagi ang suspek nga si Solitario.

Napungot si Solitario sa dihang gimaoyan siya sa biktima sa iyang pag-agi hinungdan nga iyang gitigbas ang biktima og lagaraw.

Nasamad sa nawong si Milagrosa ug dali siyang gidala sa Davao Regional Hospital sa siyudad sa Tagum aron mapatambalan.

Ang suspek nasikop sa mga mirespondeng sakop sa Laak Municipal Police Station. Migawas sa inisyal nga imbestigayon sa kapulisan nga dunay daang bikil ang duha ug sa dihang nag-abot natigbasan sa suspek.

Kapulisan sa lungsod sa Laak mihimo na og dugang pakisusi sa hitabo. (Marvin Pineda)