WA nay kinabuhi dihang napalgan ang usa ka lalaki sud sa iyang lawak nga gipuy-an nga gipanag-iyahan sa kompaniya nga iyang gialagaran niadtong Dominggo.

Ang biktima mao si Roberto Bustamante, 39, minyo, stay-in worker sa Green Heights Convention Center nga nahimutang sa Diversion Road, Barangay Buhangin Proper, siyudad sa Davao.

Si Senior Police Officer 2 Joel Podador III sa Buhangin Police Station nagbutyag sa iyang spot report nga ang biktima napalgan nga wa nay kinabuhi pinaagi sa iyang kauban nga si Fernando Potante.

Si Potante gikatahong nangita sa biktima sayo sa buntag aron ablihan ang balay patigayon nga ilang gialagaran apan wa niya makita ang biktima.

Tungod sa maong hitabo, gisuwayan pagsusi ang lawak sa biktima mao nga ilang nasayran nga wa na magginhawa ang biktimang si Bustamante.

Mga kaubanan sa biktima maoy nagpahibawo sa kapulisan bahin sa nahitabo sa biktima mao nga miresponde dayon ang mga sakop sa Scene of the Crime Operatives (Soco).

Si Senior Police Officer 2 Antonio Alcozar, duty investigator sa Soco, nagbutyag sa spot report sa kapulisan nga way sinyales nga magpamatuod nga dunay foul play ang kamatayon sa biktima.

Gipahiluna na dayon sa mga otoridad sa lokal nga punerarya ang patay nga lawas sa biktima. (Alger Dura)