NAGWELGA ang transport group human wala na maagwant ang kataas sa multa nga gipatuman kagahapong adlawa sa Land Transportation Franchising and Regulatory Board (LTFRB) uban sa Department of Transportation and Communication (DOTC) ug Land Tranportation Office (LTO).
Ang grupo sa Solidarity of Transport Alliance in Northern Mindanao (Starex-Piston) denhi sa siyudad sa Cagayan de Oro mipahigayon og welga sa denhi sa siyudad nga nagsugod sa Macasandig, Cogon, Carmen paingon sa buhatan sa LTFRB-10 ug LTO-10 ug sa pagbalik diha mopaingon sa City Hall ning siyudad. Si Dodong Galleros, Presidente sa Starex Piston ning siyudad miingon nga nagkahiusa sila uban sa iyang membro nga mohimo og caravan diin aduna pay nagikan sa nagkalain laing probinsya sa pulo sa Mindanao.
Matud ni Galleros nga mibahad kanila ang LTFRB nga kung mogamit og dyip sa caravan kanselahon ang prankisa niini hinungdan nga napugos sila sa pagamit og pribado nga sakyanan.
Tumong sa welga nga ilang gihimo mao nga supakon ang gipatuman sa LTFRB nga Joint Administrative Order (JAO) 2014-01.
Ang JAO gipatuman kagahapong adlawa diin usa kini ka administratibong mando nga nag-imposar og taas kaayo nga multa ngadto sa mga kolorum ug walay mga lisesnya nga public utility vehicles (PUVs).
Sugod kagahapong adlawa ang mga colorum bus operators, adunay multa nga P1 million; trucks ug van operators, P200,000; sedan operators, P120,000; jeepney owners, P50,000; ug motorcycle operators, P6,000 nga nakalatid sa mando. Reaksyon ni Galleros niini nga dili kini tiaw nga silot sa mga operator nga naningakamot nga makapanginabuhi.
Hinuon wala siyay supak niadtong mga kolorum tungod kay kinahanglan man gyod sila nga magparehistro.
Apan daw gisakyan na kini nga mando nga bisan ang mga signal light ug uban pang daot parte sa sakyanan ang gimultahan og dako kaayo.
Dugang niini nga dili maundang ang kolorum kung dili usab mohunong ang kotong police.
Gikabalaka usab ni Galleros nga basin unya mosakay sa panahon ang mga kotong police ug palabyon lamang ang mga kolorum nga sakyanan bugti sa mga dagko nga kantidad labina niadtong dili makabayaad sa ingon ana kamahal nga multa.
Una nang gibutyag ni LTFRB-10 Regional Director Mandangan Darimbang nga walay madakpan niini kung ang mga operator moparehistro og sakto sa ilang mga kolorum nga sakyanan.