PATAY ang usa ka lalaki human giluba nilabayng adlaw sa Purok-2, Barangay Poblacion, siyudad sa Valencia, Bukidnon.

Giila ang biktima nga mao si Ryan M. Cariño, hingkod ang edad, ulitawo, residente sa susamang dapit.

Sa inisyal nga imbestigasyon sa Valencia City Police Office, nasuta nga mga alas 7:00 sa gabii ang biktima adunay ka-argumento nga usa ka lalaki.

Human sa panaglalis, kalit lang dayon niining gigukod ang biktima paingon sa puloy-anan sa silingan ug didto giayo og luba ang biktima.

Nakaangkon kini og samad dinunggaban sa iyang dughan, kamot ug dakong samad sa tiyan nga bahin.

Daling misibat ang suspetsado human sa pagpangluba samtang ang biktima gidala sa Laviña General Hospital apan dead on arrival kining gideklarar sa mga doctor.

Ang kapolisan padayon pa nga miimbestigar sa kaso ning panahona labina gyod ang motibo sa pagpangluba ug ang pag-ila sa suspetsado. (SVB)