GIPANGITA na sa mga awtoridad ang nanag-iya sa plantasyon sa marijuana nga gipang-ibot sa mga pulis alas 2:00 sa hapon, Miyerkules, Mayo 31, 2023, sa Alamada, Cotabato Province.

Gibutyag ni Alamada chief of police Major Bernard Abarquez nga nakadawat sila og taho gikan sa mga sibilyan nga dunay plastasyon sa marijuana sa Barangay Guiling, Alamada.

Abtik nga nagpahigayon og operasyon ang mga pulis ug nadiskobre mismo nila ang dakong luna nga gitamnan sa mga "fully grown marijuana plants".

Gipang-ibot dayon sa mga pulis, gidauban samtang ang uban gidala alang qualitative test sa Cotabato Provincial Forensic Unit, Kidapawan City.

Kantidad og lima ka libo ka pesos ang gipang-ibot nga marijuana basi sa drug market value, walay labot pa niini ang mga semilya nga itanumay pa.

Kahinumdoman nga dunay mga plantasyon pa sa marijuana ang nadiskobre niadtong miaging bulan sa utlanan sa Alamada ug Maguindanao del Norte.

Kasamtangan padayon pa ang operasyon sa Alamada Municipal Police Station sa mga indibiduwal o grupo nga nalambigit sa pagpamaligya og marijuana.