COTABATO CITY - Subling nanghasi ang mga miyembro sa Bangsamoro Islamic Freedom Fighters (BIFF) sa managlahing pagpamomba bag-ohay lang didto sa probinsiya sa Maguindanao.

Gibutyag ni Joint Task Force Central Spokesman ug CMO Mindanao Regiment Commander, Colonel Gerry Besana nga unang mibusikad ang improvised explosive device (IED) sa Dicalongan Bridge sa Ampatuan alas 7:20 sa buntag niadtong Martes.

Wala hinuoy naangol sa pagbuto sa bomba apan nakamugna kini og sobrang kahadlok sa mga molupyo sa maong dapit.

Gisundan sa laing pagbusikad sa landmine alas 8:10 sa buntag didto sa Sitio Perez, Barangay Maitumaig, Datu Unsay.

Gikanayon ni Col. Besana nga nagpahigayon og combat clearing operation ang puwersa sa militar sa Mount Firis sa diha nga natamakan nila ang landmine ug mibusikad.

Patay on the spot ang usa ka sundalo ug grabe nga naangol ang lain pa niyang kauban nga anaa karon sa talandugong kahimtang sulod sa Camp Siongco Hopital.

Gipalig-on pa sa Joint Task Force Central ang paglutos sa BIFF sa probinsiya.