ANAA sa 138 ka mga indibidwal ang misalmot sa open tryout nga gipaluyuhan sa Philippine Football Federation pinaagi sa Davao Regional Football Association (DRFA) sa Tionko Football Grounds.

Si DRFA official Rachelle Delos Reyes misulti sa Facebook chat sa SunStar Davao nga natigum nila ang 23 under-(U)13 girls, 58 U13 boys, 19 U15 girls ug 38 U15 boys gikan sa lain-laing tunghaan ug clubs.

"The final inspection will be on hand during the Blue Cup and Sakya Cup," matod ni delos Reyes nga midugang sa pagsulti nga ang ubang aspirants mosuway sa tryout karong Pebrero 11 ug 12 sa samang venue.

Si coach Ruel Sasuman ug Kevin Rondel Yatan ang nangamot sa boys U13 samtang si coach Michelle Alfeche-Javellana ug Keith Shelly Canton sa distaff side.

Ang boys U15 gipangunahan sab ni coach Jose Maria Cabalfin ug Imardino Polo samtang ang mga babaye gigiyahan ni Analou Ingles.

Tumong niini nga makakita og maayong atleta alang sa 2017 Regional Festival of Football karong Marso 3 hangtod 5 sa Fifa Football Training Center sa Valencia, Bukidnon. (ABM)