MATALAM, North Cotabato - Duha ka lalaki nga gikan sa disco atol sa pista ang gipamusil patay samtang laing usa ang naangol sa dihang pauli na sa ilang mga balay.

Nahitabo ang pagpamanhig alas 12:50 sa kaadlawon kagahapon.

Giila ang mga namatay nga sila si Jerome Dioso Francisco, 31, minyo, ug Danilo Santillan Montero Jr., 21, ulitawo, mga mag-uuma ug molupyo sa Purok 1, Brgy. Salvacion, Matalam, North Cotabato. Samtang ang naangol si Bimbo Candare Ereje, 43.

Gibutyag ni Supt. Bernard Tayong, tigpamaba sa North Cotabato Police Provincial Office nga sakay ang mga biktima sa ilang motorsiklo didto sa Brgy. Kibudoc, Matalam.

Apan kalit silang gipamusil sa wala mailhing mga armadong lalaki gamit ang kalibre.45 nga pistola, kinsa abtik sab nga miikyas dala ang duha ka motorsiklo nga gipanag-iyahan nila Ereje ug Francisco.

Samtang patay gilayon ang mga biktima nga pulos nakaangkon og samad pinusilan sa ulo.

Nasayran nga gikan ang mga biktima sa disco sa pista sa Barangay Kibudoc sa dihang gibanhigan.

Blangko pa ang kapulisan sa Matalam Municipal Police Station sa mga tawo nga dunay kalabutan sa pagpamanhig ug padayon pa ang ilang imbestigasyon.