MIDUGANG si Marella Salamat og bulawan alang sa Pilipinas human nanguna sa women's individual sa cycling kagahapon aron moabot na og kinatibuk-ang 22 bulawan ang nasud sa nagapadayong Southeast Asian Games sa Singapore.

Si Salamat mi-oras og 44 minutos ug 46.38 segundos nga 46 segundos lang ang lamang batok Thailand's Chanpeng Nontasin aron madominar sa maong event didto sa Marina Bay South.

Samtang ikatulo ang Singapore's Siew Kheng Chan nga mitala og 47:44.91.

Sa laing duwa, midaug sa opening game ang Men's volleyball team sa Pilipinas batok sa Malaysia sa 2015 Southeast Asian Games sa Singapore.

Gipalukapa sa Pilipinas ang Malaysia sulod sa upat ka set sa iskor nga 20-25, 25-23, 25-18, 25-19 sa OCBC Arena.

Nanguna ang Ateneo star nga si Marck Espejo nga may 17 puntos ug mitabang si John Vic De Guzman og 14 puntos.

Samtang mibawi kagahapon ang women's volleyball tim sa nasud human gilampaso ang Malaysia sa iskor 15-25,18-25 ug 16-25.

Sayo niini, napakyas sila sa unang duwa batok Indonesia 25-22, 25-20, 25-14 sa Pool B opener diin nga miprotesta ang Pilipinas tungod sa usa ka magduduwa sa kalaban nga si Aprilia Santini Manganang, kinsa gidudahang lalaki.

Apan ang maong protesta gibasura sa Southeast Asian (SEA) Games organizers.