TALIWALA gihunong sa kapolisan ang operation toktok hangyo kon tokhangh labot sa ginadili nga droga dinhi sa nasod lakip dakbayan sa Cagayan de Oro apan dili mohunong ang kapolisan sa paghimo og pamaagi nga mapadayon ang ilang gisugdan nga mga programa.

Sa Police Station 1 sa Divisoria gibutyag ni Police Senior Inspector Maricris Mulat nga napadayon ang ilang giplanong rehabilitasyon ngadto sa mga surrenderee sa ginadili nga droga.

Ning panahona ang ilang mga benipisaryo mao ang tanan mga kababayen-an nga adunay kalambigitan niini.

Sa kasamtangan adunay 25 ka mga kababayen-an ang gipaubos sa rehabilitasyon ug susama sa mga rehabilitasyon nga gihimo sa kapolisan ug pipila ka barangay mouli gihapon sa ilang tagsa-tagsa ka puloy-anan ang mga respondent niini.

Matud ni Mulat nga tumong nila nga mobalik ug makasugod sa bag-ong kinabuhi ug ingon man mabag-o ang ilang panghuna-huna kon marehabilitar.

Gibutyag sab niini nga andam ang Technical Education and Skills Development Authority nga hatagan sila og skills training aron makasugod sa bag-ong panginabuhi.