GILAMPASO sa Aguilas Dabaw Football Club ang Soya Football Club, 4-0, aron mokampeyon sa bag-ohay lang nga nahuman nga 12th Acosta Cup Football Ladies Tournament sa Tionko football grounds.

Gipakita sa Aguilas ang ilang pagkadominante sa duwa aron maseguro ang korona sa matag tuig nga torneyo nga giisponsoran ni Davao City Councilor Mabel Sunga-Acosta ug gi-opisyalan sa Davao Football Association (DFA).

Samtang ang PCT-Khanj gipildi ang Punta-DDS, 3-1, aron makuha ang ikatulong puwesto.

Si Acosta maoy nanguna sa awarding ceremonies kauban si DFA president Erwin Protacio, Charles Raymond Maxey kinsa maoy represetante ni Sports Development Division of the City Mayor's Office (SDD-CMO) officer-in-charge William "Butch" Ramirez ug CMO representative Barangay Captain Edgar Ibuyan, Jr.

Captain Rey Acosta ug ilang anak RV Acosta anaa sab sa awarding rites diin gidawat sa Aguilas ang tropeyo ug certificate alang sa tim ug medalya kauban ang jerseys sa matag magduduwa.

Ang sunod nga duha ka tim nakadawat sab og certificates, trophies ug medalya.

Gihatagan sab og mga tokens ang coaches, referees, partners ug sponsors lakip ang CMO, Vibrant Earthmovers, Bin Jaime Enterprises, Ulticon Builders Inc., RDL Pharmaceutical Laboratory Inc. and St. John Paul II College of Davao. (MLSA/PR)