GIPASALIG sa Police Regional Office (PRO)- Northern Mindanao nga wagtangon ang illegal swertres sa tibuok rehiyon.

Kini ang gibutyag sa tigpamaba sa PRO-Northern Mindanao nga si Senior Superintendent Gervacio Balmaceda Jr. ug miingon nga direktiba ni PRO Regional Director Lynde Desquitado nga wagtangon gyod ang naghitak nga illegal swertres sa rehiyon.

Dugang niini nga laing programa pa usab ang gidugang pinaagi sa community relation campaign diin apil ang komunidad motabang kanila sa pagtudlo kinsa ang nihimo sa mga illegal nga kalihokan.

Gibutyag ni Balmaceda nga mihimo og aksyon si Desquitado tungod kay una na niining nadawat ang report nga mikunhod ang kita sa legal swertres sa Philippine Charity and Sweeptakes Office (PCSO) sa rehiyon.

Sa bahin ni PCSO Branch Manager Raul Regondola, gilauman niini nga buhaton sa kapolisan ang ilang gipasalig tungod kay gakasakit siya nga kadtong mga kabus nga sagad gapangayo og tabang sa ilang buhatan ang gaunay og tapad sa piso piso nga swertres diha sa illegal outlets. (SVB)