IKADUHANG target sa listahan nga tigpayuhot sa ginadili nga druga ang nasikop sa kapolisan niadtong Huwebes sa Libona, Bukidnon.

Giila ang suspetsado nga mao si Rolando Silada Sr., residente sa susamang dapit.

Sa report sa Libona Police Station nasuta nga taod-taod na nga gitiktikan ang suspek ug gani moabot na og usa ka tuig ang pagkalambigit ug pagpayuhot sa ginadili nga druga sa dapit.

Nakuha ang mga illegal drug paraphernalia uban sa mokabat 20 ka pakete sa gituohang shabu nga adunay gibana-banang kantidad nga P20,000.

Giingong apil sa gaatiman sa ilang mga bisita sa drug den ang anak niini kung wala ang amahan. Gani niaging katuigan nasikop ang laing usa ka anak sa suspetsado kinsa nalambigit gihapon sa ginadili nga druga. (SVB/Sunnex)