GISUGDAN na sa Land Transportation Franchising and Regulatory Board (LTFRB) 7 ang pagpanakop sa Angkas drivers diin upat ang nangasikop kagahapon.
Mao kini ang labing una nga higayon nga nanakop ang LTFRB 7 sa Angkas drivers diin giisip na sa ahensiya nga nasira na ug kolurom.
Kagahapon, nasuwayan ang upat ka mga driver nga naglakip kanila ni Ramel Verano, Kinasang-an, Cebu City; Japed Salimas, Tisa, Cebu City; Leo Geraldizo, Sambag Uno, Cebu City; ug Adonis Rey Tampus, Dumlog Talisay.
Matod ni LTFRB 7 Regional Director Ahmed Cuizon nga alas 2:00 ngadto sa alas 3:00 sa hapon kini nila gisuwayan og book ug gidakop.
“Yes nag-book me, gi decoy namo, among employees maoy nisakay,” si Cuizon dihang nahinabi sa Superbalita Cebu.
Gipamulta og P6,000 ang upat nga nadakpan ug gi-impound ang mga motorsiklo niini.
“Dili pa makuha, wait until our lawyer will decide on it,” nagkanayon si Cuizon.
Gipasabot ni Cuizon nga usa ka Transport Network Company (TNC) ang Angkas ug susama sa Grab ug Uber nga usa ka transport network vehicle service (TNVS).
Ang nakalahi lang, ang Uber ug Grab aduna’y provisional authority sa LTFRB 7 apan ang Angkas wala.
“I am warning all motorcycle operators of Angkas, to refrain from engaging in a business that they are not authorized to do.”
Dugang ni Cuizon nga wa’y otoridad ang Angkas isip TNC ug hilabi na ang miyembro niini nga mga drayber nga nagpakaron-ingnon nga TNVS operators.
“Just like any other business that needs government authorization to operate, Angkas must first be authorized as a legal entity before it can undertake legitimate operations,” si Cuizon nagkanayon.