GILABNI ang dalang bag ug gikulata pa sa mga suspetsado nga nagmotorsiklo ang usa ka babaye niadtong Huwebes sa gabii samtang nagbaklay sa C.M Recto Highway, Lapasan ning siyudad sa Cagayan de Oro.

Mokabat ngadto sa P10,500 nga kwarta, mga dokumento, yabe, ATM, ug importanteng gamit sulod sa bag ang nakuha gikan kang Maria (dili tinuod nga ngalan), 25, minyo ug lumolupyo sa San Juan 2, Lapasan ning siyudad.

Sa report sa Police Station 3 sa Agora, nasayran nga samtang nagbaklay ang biktima sa nahisgutang dapit tulo ka wala maila nga suspetsado ang kalit nga mibunlot sa dala niini nga sling bag.

Nisulay pa sa pagsukol ug pagdumili ang biktima apan gikulata kini sa usa sa mga suspetsado kinsa mikanaog gayud sa gisakyang motorsiklo hinungdan nga nakaangkon ang biktima og bun-og sa kalawasan nga mao usab nag-aghat kaniya sa pagpatala gumikan na usab sa kahadlok ug kabalaka.

Pulos nakasul-ob og helmet ang mga suspetsado ug nag-jacket nga adunay hood kinsa daling mipalayo sakay sa motorsiklo paingon sa Barangay Gusa.

Sa pagsulat niini nga balita, nakatala na ang maong insidente aron sa pagpamasin nga masikop ang maong mga suspetsdo.