TUNGOD sa risgo sa pagdahili sa yuta, boluntaryo na nga gipaguba ni Michael Aleman ang iyang balay kagahapon sa Sitio Garaje, Barangay Busay, dakbayan sa Sugbo.
Siya usab ang nagpadagan karon sa Mountain View Nature Park diin giawhag na sila sa siyudad nga i-demolish ang bahin sa ilang building nga giingong public hazard.
Matod ni Cebu City Disaster Risk Reduction Management Office (CCDRRMO) Nagiel Bañacia nga nag-istorya sila kagahapon ni Aleman ug nagkanayon kini nga andam siya moguba sa iyang balay ug kagahapon iyaha kining naabtan nga ni-salvage sa iyang mga butang sa balay.
Dugang ni Bañacia nga alas 5:00 sa hapon niadtong Martes dihang gisugdan pag-demolish ug gipadayon kini nila kagahapon diin ilang gisunod pagguba ang taas ug adunay staff sa barangay ug disaster nga naa sa ubos nga mag-control sa traffic.
Nagkanayon si Bañacia nga tungod kay private property man kini, di makapanghilabot ang siyudad sa luna apan gihangyo lang nila nga paneguraduon nga di nag mag-landslide sa dapit.
Di pa usab maagian ang dapit apan dunay diversion road nga gibuhat ug mahimong adto moagi sa Barangay Babag.
Ang executive assistant ni Cebu City Mayor Tomas Osmeña, Francisco “Bimbo” Fernandez dihang gipanguta kon di ba mohatag ang siyudad og assistance sa tag-iya sa balay nga boluntaryong miguba matod niya wa nangayo ang tag-iya apan kon pananglitan nga ilaha kining buhaton balibaran kini sa siyudad kay matod pa wa nila kini kinahanglana.
Gihulagway usab ni Fernandez nga positibo ang boluntaryong pag-demolish sa building.