ORMOC CITY, Leyte - Usa ka bangka ang natikyaob sa kadagatan sakop sa Barangay Talisayan, lungsod sa Albuera Leyte.

Matod ni Coast Guard Ormoc City Station commander Giovanni Bergantin, nakadawat sila sa report gikan sa Ormoc City Disaster Risk Reduction Office (CDRRMO) pasado alas 5 sa hapon.

“Yung MDRRMO ng Albuera nagtawag sa CDRRMO dito sa Ormoc na meron daw tumaob na bangka,” matod ni Bergantin.

Nipadala gilayon og unom ka mga sakop ug rubber boat ang PCG-Ormoc Station ug District Eastern Visayas sa dapit alang sa rescue operation.

Matod ni Bergantin, sa pasiunang nga report, usa ka sakayan ang natikyaob sukwahi sa naunang report nga tulo.

Duna kini sakay nga bata ug dako nga posibleng ginikanan niini.

Sa paghimo ning balita, gisugilon ni Bergantin nga toa pa sa dapit ang iyang mga sakop ug wala pay gipasa nga latest report.

Giawhag sa Coast Guard ang mga mananagat nga di mopugos sa pagpanagat hilabi kon dagko ang bawod taliwa sa kanunay nga pagdaut sa panahon ning nakalabay nga mga adlaw..

Ang pagdaut sa panahon dala sa low pressure area ug hangin nga amihan.

Dunay gagmay nga mga sakyanan sa dagat nga wa pabiyahia sa Coast Guard base usab sa mga pahimangno sa Philippine Atmospheric Geophysical Astronomical Services Administration (Pagasa).