KON maghisgot kitag TNT (tago nang tago sa Tinagalog) way lain nga mosantok sa atong pangisip kon di kadtong mga Pilipino nga illegal nga niadto sa laing mga nasod sa illegal nga pamaggi. Nag-TNT kay di man sakto sa mga papeles sa ilang paglalin ngadto sa laing nasod sama sa Estados Unidos.
Kasagaran kanila mga turista kon dunay mga tourist visa apan wa na mopauli kay namasin sa mas hayahay nga kinabuhi didto sa laing nasod. Mokabat na gani sa walo ka milyon ka mga Pilipino ang tua sa Estados Unidos nga luparon pag labing minos 13 ka oras gikan sa Pilipinas.
Kadaghanan kanila mga propisyonal, busa di maglisod sa pagpangitag trabaho didto sa laing nasod. Ang uban maninyog naturalized American citizens busa nahimo na sab nga legal ang ilang pag-estar didto.
***
Dugang pa niini mao ang panon sa mga overseas Filipino workers (OFWs) nga atong giila nga mga bag-ong bayani.
Bag-ong bayani tungod kay ang ilang kinitaan gipadala man nganhi sa Pilipinas ug nakatabang sa pagpalambo sa atong ekonomiya.
Tinuod nga ang ilang kinitaan di mahipunta sa panudlanan sa gobyerno. Pero mao kini ang nakapabuhi sa real estate market kay ang ilang kita gipalit man og mga balay, mga muebles ug appliances.
Inig abot sa kuwarta nga ilang gipadala, alegre ang ilang pamilya dinhi sa Pilipinas kay magsigig shopping, mangaon sa mga restaurant ug maglulinghayaw.
***
Apan kinsay magdahom nga duna sab diay mga illegal alien dinhi sa Sugbo. Niadtong Martes, gironda sa kapulisan ang pipila ka kabalayan sa mga subdivision dinhi sa siyudad ug gipangsikop ang 69 ka mga Taiwanese ug Chinese national.
Ang ilang racket mao ang pag-blackmail sa ilang mga kaparehong Chinese ug Taiwanese nationals. Pangayoan og kuwarta. Ang uban ipabalhin pa ang ilang bank account ngadto sa sindikato aron kunohay makalikay sa imbestigasyon.
Kining maong mga gitawag nga illegal aliens naghupot lang og mga tousist visa busa di unta makatrabaho o makanegusyo sa Pilipinas. Apan kinsay manginahanglan og permit sa illegal nga kalihokan?
***
Di lang kay kana ra. Niadtong miaging Biyernes, gironda sa mga ahente sa National Bureau of Investigation (NBI) 7 ang usa ka call center diha mismo sa Cebu IT Park ning siyudad sa Sugbo ug gipangsignit ang 60 ka mga Japanese national nga illegal nga nagtrabaho sa maong call center.
Ingon na niini kakusog ang atong call center industry. Hastang mga Hapon dia na motrabaho sa Sugbo. Ang nakadaot lang kay illegal ug way mga working visa Sukaranan sa kanihitang maong Japanese nationals.