WA magdahom ang mga ginikanan sa usa ka tuig ug unom ka buwan nga bata nga dunay dautang mahitabo sa ilang anak niadtong Lunes sa buntag.
Mga ginikanan ni Patricia Jane Carbelledo niadto sa balay sa ilang mga apohan sa Barangay Anopog, Pinamungajan niadtong Lunes aron pagpanghuwam og kwarta.
Ang kwarta ilang ipalit og tambal sa ilang anak nga gihilantan.
Sa ilang pagpanguli sa balay sa Purok Bakhaw, Brgy. Cabiangon sa samang lungsod nianang hapon, ilang nakaplagan nga nalumos na si Patricia sa gamay nga balde sa tubig.
Dali nilang gidala ang ilang anak ngadto sa ospital sa lungsod, apan napakyas ang mga doktor sa pag-revive sa bata.
Ang batang babaye patay na sa ilang pag-abot sa emergency room sa ospital.
Matod ni PO1 Nathaniel Mansueto nga si Carbelledo gisalig sa mga ginikanan ngadto sa duha ka mga iyaan niini, nga mga manghod nga babaye sa inahan.
Namiya ang mga ginikanan sa mga alas 10 sa buntag.
Sa imbestigasyon nasayran nga ang mga iyaan, 15 ug 11 anyos, nakatulog samtang nagbantay sa ilang pag-umangkon.
Sa wa pa sila makatulog, gipahigda tupad nila sa karte si Patricia hangtod nga sila nangahinanok.
Mga ala 1:40 sa hapon, nauli ang mga ginikanan.
Ang amahan nga si James mao ang unang nakadiskobre sa ilang anak sa balde gawas sa ilang balay. SunStar Cebu