SIGURO nakadungog ka na ining inila nga dapit nga gitawag og Amazon Desert. Motuo ka o dili, kaniadto ang tawag ini Amazon Rainforest, usa sa pinaka nindot nga lugar ning kalibutan sama sa paraiso nga puno sa mga luntiang mga buwak, klasi-klasing tanom, mga binilyon nga mga habog nga kahoy nga maoy nahimong pinuy-anan sa mga hayop, mananap og gikuhaan sa tawo sa tanan para mabuhi gikan sa pagkaon, preskong tubig og labaw sa tanan abundang hangin.
Ang makaguol kay pipila ra kanato ang naghatag og balor sa kabililhon ini. Ang karong mga bag-ong tubo nga natawo og nagdako nga gipalibutan sa modernong mga teknolohiya og edipisyo, wala nay pagpangilabot sa palibot.
Ang kahoy maoy naghatag nato og oxygen aron kita makaginhawa, naglimpyo sa polusyon sa hangin, nagpundo ug limpyo nga tubig para duna kita’y mainum, naghatag og tambal para maayo kita sa sakit.
Apan subo palandungaon kay ang mga kakahuyan ug kalasangan gipangsunog ug ang uban mangtas nga gipamutol para ipamaligya. Gani 50% na lang ang mga nahabiling buhi nga kahoy nga nagbarog sa tinuok kalibutan.
Ngano? Tungod sa sapi. Kasagaran nato karon wa nay huna-huna og paki-alam sa umaabot nga ugma. Gipalabi ang kahakog nga makabaton og tawhanong bahandi ug kon unsaon para mapadaghan ang sapi lakip ang pag-abuso sa kinaiyahan.
Tungod kay ang mga kahoy ana-a ra man pirming makita sa palibot, kini gibaliwala tungod sa hiwi nga panghuna-huna nga kini magamit para sa kalambuan. Hangtod karon dunay uban nga dili motuo sa “Climate Change”.
Sa nasud nga China pananglitan, ang mga bata nagsul-ob na og pollution mask panahon nga moeskwela tungod sa kahugaw sa ilang hangin, sa Bangladesh pila ka banay ang nawad-an og pinuy-anan kay nanga-anod sa tubig baha og misaka ang tubig dagat.
Kada usa nato dunay matampo. Unsaon? Balik ta sa kagahaponnga gipanghimo sa atong mga mag-uuma nga kung malawos ang dahon, unahon pagtambal ang gamot niini. Matag usa kanato dunay matabang pagsumpo ini labi na kung ang tanan magkahugpong og magkahi-usa sa tumong.
Samtang dili pa uwahi ang tanan, anagay undangon ang pagpamutol sa kahoy og sugdan na ang pagpakabana sa palibot ug pananom. Madako man o magamay, ana-a ra nimo ang pagdesisyon sa pag- atiman sa atong bugtong nga kalibutan kay inig panukot sa kina-iyahan, hubas sa tubig, hurot sa mga kahoy ug tanaman, hugaw sa hangin, una ka pa makapanghinuklog nga ang sapi dili makaon.