PINULONGANG Binisaya o Cebuano mao unyay gamiton sa mga konsehal sa konseho sa dakbayan sa Talisay atol sa ilang session karong sunod semana.

Kini human napasar ang usa ka resulosyon nga gipangamahanan ni Konsehal Julian “Teban” Daan nga matag katapusang semana sa Pebrero atol sa session sa konseho mogamit silag Binisaya.

Matod ni Daan nga ang buwan sa Pebrero mao ang buwan sa alampat ug kultura o arts and culture nga giproklamar kaniadto ni kanhi Presidente Cory Aquino.

Busa sa pagsaulog niini, ang tanan magbinisaya hasta ang sila nga magpahigayun og sesyon.

Siya maoy gisangunan sa konseho sa paghimu sa ilang mga ipangbatbat tungod kay siya man ang suhito sa pinulungang binisaya ikumpara sa iyang mga kauban.

Nipasabot si Daan nga way multa og penalty alang ngadto sa mga empleyado ug opisyal nga makalitok og pulong langyaw apan ang importante ilang mahandum ang maong kalihukan pinaagi sa paglitok sa Binisayang pinulongan.

Mahimo ra usab silang mag-ininglis kon maglisod ang mga konsehal sa paghubad sa Binisaya sa usa ka pulong nga Ininglis.

Nagkanayon si Daan nga ila na kining nasuwayan kaniadto sa dihang usa pa siya ka sakop sa huta probinsyal.