TUNGOD sa gibating kaulaw, midangop sa Buhangin Police Station ang usa ka 28-anyos nga babaye human siya giingnan nga nagpahabal bisan wa pa miabot ang 40 diyas sa iyang namatay nga bana.

Huwebes sa hapon nagpatala ang usa ka Stephany (bansagon gitago sa SuperBalita), 28, taga Purok San Jose, Carmilite Road, Barangay Buhangin Proper, siyudad sa Davao.

Subay sa blotter nga natala sa kapulisan, gireklamo ni Stephany ang iyang duha ka mga babaye nga silingan nga sila Joy ug Mellen human giingong gipanabi siya nga nagapahabal siya sa ilang mga silingan.

Alas 12 sa udto niadtong Huwebes, gikompronta ni Stephany ang duruha gumikan nabaniog sa ilang lugar ang maong tsismis apan misamot ang kasuko sa reklamante human giingnan siya nga "mikatol napod imong kinatawo, wa pa gani 40 diyas nangatol napod."

Giingong wala nay ikaatubang ang reklamante sa ilang mga silingan human siya gibuhatan og tsismis nga bisan kinsa nalang ang mo-sex kaniya human namatay ang iyang bana.

Ang kapulisan sa Buhangin nagmandu sa reklamante nga ipatawag sila sa barangay aron didto sila mahusay.