LIMA ka Dabawenyos lakip ang magsuong Jaro, Sonny Wagdos, ug Olympian Sheila Mae Perez ang nakabulawan sa AFP-PNP-PCG Olympics 2016 athletics ug swimming events sa Philsports Arena sa Pasig City niadtong Huwebes,Septyembre 15.
Si Private Criselyn Jaro mibulsa og tulo ka bulawan aron manguna sa Philippine Army's (PA) overall championship sa athletics.
Mioras siya og 14 minutos ug 30 segundos sa women's 3,000-meter steeplechase dayon mirehistro og 18 minutos ug 12 segundos sa women's 5,000m run.
Mitabang sab siya sa Armys women's 4X400 relay tim aron makabulawan.
Bahin ni Airman Sonny Wagdos, mihatag sa Philippine Air Force (PAF) og usa ka bulawan sa men's 5,000m human mitala og 15 minutos ug 58 segundos ug nakaplata sa men's 1,500m sa oras 4:12.
SiSergeant Roel Ano sa Philippine Air Force (PAF), ang beteranong coach gikan sa Davao City, miingon si Wagdos mitabla sa PAF ug PA nga dunay 15 matag usa.
Si Ano, kinsa naka-bronze sa men's 10,000m walk, miingon, "Last event ang 4x400m relay mao ang deciding game. Nakuha ng Army led by Jaro, champion ang Army by one medal. May 16 golds sila, kami 15."
Miapil si Jaro sa Army niadtong Septyembre sa milabay nga tuig samtang University of Mindanao's multi-titled trackster Wagdos naapil sa PAF niadtong Septyembre 3 ning tuiga.
Ang maguwang si Cynthia Jaro, midaug sab sa women's 5,000m walk ug ang manghod nga si Cellie Rose, 22, midugang og duha ka bronzes sa women's 10,000m run ug 5,000m run alang sa PAF.
Si kanhi Brokenshire College' Anthony Nerza maoy mihari sa men's 3,000m steeplechase ug ikaduha sa men's 10,000m run samtang Michael Constantino midugang og bulawan sa men's 4X400m relay ug plata sa 800m alang sa PAF.
Si Sergeant Merasol Abad, kinsa midako sa Sasa, nabutang sa ikaduha sa women's 5,000m run ug 1,500m run samtang PA Private Christy Joy Capaniarihan nakaplata sa women's 100m hurdles silver ug bronze sa 400m hurdles.
"Lingaw kaayo ang dula Davao vs Davao ang labanan, Gahi jud mga taga Davao."
Samtang si Perez midaug sa women's 200m freestlye event alang sa Philippine Coast Guard.
Ang swimming competition nahuman sab niadtong Huwebes.
Matud ni Perez nga miapil lang siya sa duha ka events alang sa women's division.