KAYOD marino sa pagpromote karon ang bida sa pelikulang “Northern Lights, a Journey to Love” nga si Piolo Pascual.

Hapit tanang programa sa Kapamilya makita nato si Piolo uban sa iyang bag-ong leading lady nga si Yen Santos.

Gawas sa “ASAP” nga mainstay si Piolo busy kini sa pag-bisita sa uban pang programa. Nigawas siya sa “Magandang Buhay,” diin nahinabi siya nilang Karla Estrada, Jolina Magdangal ug Melai Cantiveros bahin sa iyang pagka-single father. Kauban usab niya ang anak nga si Iñigo Pascual.

Lagari ang guapo sa “Showtime”, “Family Feud” ug sa birthday presentation ni Vice Ganda sa “Magandang Vice.” Gihurot sab og duaw ni Piolo ang mga malls sa tibuok Pilipinas makaimbitar lang sa katawhan sa iyang pelikula.

Gani dinhi usab sa Sugbo ang Piolo uban ni Yen Santos aron personal nga imbitaron ang mga Sugboanon sa ilang movie.

Mahitungod sa relasyong amahan ug anak isip single father ang dagan sa istorya niining “Northern lights”.

Human sa pelikula nila ni Dawn Zulueta ug Coleen Garcia, karon napunta siya kang Yen Santos.

Nganong si Yen man? Daghan ang nangutana. Si Yen usa sa mga paborito karon sa Dos kay dili gyud kini mawagtangan og bonggang proyekto.

Human nagbida sa teleseryeng “Pure Love” ug “All of Me” mao kini iyang biggest break sa movie ug si Piolo pa ang iyang kapartner nga dugay na usab niyang gipangandoy.

Ang pangutana kon moklik ba ang ilang tambalan ug mokita ba ang pelikula?

Tinuod nga daghan ang makarelate dinhi apan may mga pelikula naman tang nakita nga sama ini ug tema.

Unsaon man gud nga kon basihan ang trailer sa pelikula morag walay dating ug dili nimo makursonadahan nga tan-awon kini?

Pero kini tanan matubag sa pagsalida niini karong Marso 29. Kauban nila ni Piolo ug Yen sa pelikula silang Tirso Cruz III, Sandy Andolong ug ang batang si Raikko Mateo (Honesto).

Hatud kanato sa Star Cinema, Regal films ug Spring films ang “Northern Lights a journey to love” ug sa direksyon ni Dondon Santos. Ay’g saba!