ANG Davao City Police Office (DCPO) nagpatuman sa maximum tolerance sa pipila ka grupo nga nagprotesta sa gawas sa University of Southeastern Philippines (Usep) diin gihimo ang Senate inquiry sa duguong dispersal kagahapon.

Mga militanteng grupo gipangulohan sa Bagong Alyansang Makabayan nga nagkondena sa giingon nilang Kidapawan massacre nga miresulta sa kamatayon sa tulo ka mga sibilyan nga nagprotesta.

Wa gibati sa mga militante ang kainit sa adlaw, mapagawas lang nila ang ilang kasuko sa gobyerno nga nagpasagad sa mga gigutom nga mag-uuma.

Gisaway sab nila ang kapulisan nga sama og trabaho sa mga pulis nga nakapatay sa ilang mga kaubanan didto sa Kidapawan City niadtong Sabado, Abril 1.

"Among gipatuman dinhi ang maximum tolerance," sulti ni DCPO spokesperson Chief Inspector Milgrace Driz samtang naniid sa palibot sa Usep Bo. Obrero Campus kagahapon.

Si Driz midugang nga andam kanunay ang ilang mga kaubanan nga moresponde kung gikinahanglan.

"Sa mga protesta, kung lisud na ang sitwasyon, amo nang ipatuman ang contingency plan," pahayag ni Driz.

Ang opisyal, samtang nagbantay sa protesta kagahapon, nanghinaut nga di mahimong bayolente ang rally.

Hinuon, tungod kay way mga pulis nga nagpaduol sa mga raliyesta kagahapon sa buntag, dali sab silang mibiya atbang sa entrance gate sa tunghaan.