NEW BATAAN, ComVal Province - Nailhan na sa kapulisan ang upat ka mga lalaki nga gitudlong suspek sa pagkulata-patay sa driver didto sa Purok 2, Barangay Cabinuangan.

Biktima giila nga mao si Jurie B. Meliton, 35, minyo, nagpuyo sa Purok 3B, Barangay Cabinuangan, New Bataan.

Ang imbestigasyon ni Senior Police Officer 3 Carlo P. Saldivar sa New Bataan Municipal Police Station nagkanayon nga alas 9:00 sa gabii niadtong Miyerkules ang biktima kauban ang iyang mga higala nga giilang si Jerome Venus, alyas Ren-Ren, Mario Subsuban ug alyas Jun pauli na human sa ilang panag-inom sa usa Video-k house.

Miguwa sa imbestigasyon naglakaw ang grupo sa biktima dihang giharang sa grupo sa mga lalaki nga giilang si Joland Rosal nga giilang alyas Don-don Bagolaque, alyas Kapoto, alyas Valentin, alyas Ricky ug lain pang duha ka wala pa mailhing lalaki.

Gikulata sa mga suspek ang grupo sa biktima apan nakaikyas si alyas Jun ug alyas Ren-Ren.

Miguwa sa imbestigasyon nga ang biktima kinsa nabilin sa lugar ang gitabangan pagkulata sa upat ka mga suspek.

Gibunalan sab og bato ug tubo ang ulo sa biktima.

Ala 1:20 sa kaadlawon niadtong Huwebes dihang midangat ang taho sa New Bataan Municipal Police Station human nabangalan ang patay'ng lawas sa biktima nga nagbuy-od sa creek kilid sa kalsada.

Gibutyag sa taho sa kapulisan nga gilusad na sa New Bataan MPS ang pursuit operation ug halawom nga imbestigasyon alang sa pagpasaka og kaso batok sa mga suspek. ROCKYBEN S. CATISAY