LAING lalaki na usab ang napalgang patay human nga naghikot og pisi sa iyang li-og niadtong Miyerkules sa udto diha sa Zone-8, Barangay Bonbon, ning siyudad sa Cagayan de Oro.

Patay ang biktima nga nailang si Rey Nacario, 30, ulitawo kinsa giingong adunay panahon nga wala kini sa iyang maayong buot.

Gapanginabuhi sab kini isip usa ka drayber sa sikad.

Sa impormasiyon nga nahipos gikabutyag nga kanunay nga mahabilin nga nag-inusara kining biktima hinungdan usab nga nakahigayon kini sa pagpakamatay pinaagi sa paghikot sa iyang li-og ginamit ang nylon.

Nasayran sab nga napalgan kining naghikot sa iyang li-og sulod mismo sa panimalay nga nahimutang sa maong dapit.

Gidaki pa og dala sa City hospital ang biktima apan wala’y swerteng nakabsan gihapon kini sa hinulamang kinabuhi.

Sa pagsulat niini nga balita gi-atiman na sa nahabiling pamilya ang nahisgutang patay nga lawas sa biktima.