MOANHI sa Sugbo si Presidente Rodrigo Duterte karong Pebrero 12 aron makigtagbo sa mga mayor ug gobernador sa Visayas ug Mindanao.
Sa memorandum nga giluwatan ni Deparment of Interior and Local Government (DILG) 7 Regional Director Atty. Rene Burdeos, nag-awhag kini sa tanang local chief executives sa tanang probinsiya, dakbayan, ug lungsod nga motambong sa maong meeting sa Presidente.
Tumong sa presidente nga makig-estorya sa mga mayor ug gobernador sa Kabisay-an ug Mindanao aron mapaminaw ang gusto niini ipadangat kaniya.
Matod ni Cebu City Mayor Tomas Osmeña nga motambong siya sa maong meeting.
Dihang gipangutana kini kon unsa ang iyang concern nga ipaabot sa Presidente, matod niya nga iyang hangyuon si Duterte nga taktakon ang pipila sa mga gitudlo niini nga opisyal ubos sa iyang administrasyon.
Lakip niini si Department of Justice Secretary Vitaliano Aguirre, tungod kay gihulagway sa mayor nga wa kini kaayohan nga nahatag sa presidente.
Gikatakda nga sa Radisson Blu ipahigayon ang maong meeting.