KINSA ang ka-date ni Erich Gonzalez niadtong adlaw sa mga kasingkasing? Naka-move on na ba siya sa break-up nila ni Daniel Matsunaga?
Kon si Erich ang pasultion dugay na siyang nakalimot sa tanan ug sirado na ang tsapter nila sa iyang ex. Malipayon ang dalaga sa iyang status ug sobrang busy siya sa iyang career karon.
Dakong pasalamat ni Erich nga daghang grasya ang niabot karon sa iyang kinabuhi.
Sa pagkakaron, lagari ang guapa sa taping sa bag-o niyang soap nga “The Blood Sisters”.
Karon pa lang, trending ug na-okay ang tanan sa maong teleserye sa primetime bida, diin tulo ka managlahing papel ang iyang gidala.
Gidayeg si Erich sa iyang performance dinhi ug samot pa ninyo siyang higugmaon sa mosunod nga mga episode. Kauban niya silang Ejay Falcon ug Enchong Dee, silang Tanya Garcia, Pilar Pilapil, Dante Rivero, Dindi Gallardo, Jestoni Alarcon, Cherry Pie Picache ug Dina Bonnevie.
Showing na usab karong semanaha ang pelikula ni Erich nga “The Significant Other” kapartner si Tom Rodriguez ug ang katigi niyang si Lovi Poe, ay’g saba!
Ang LizQuen hapit na sad nato makita sa pantaserye nilang “Bagani” kauban silang Matteo Guidicelli, Sofia Andres ug Makisig Morales.
May aksyon, supernatural, historical, fantasy, suspense, drama ug romance ubos sa direksyon ni Richard Arellano. May mga elementong gihuptan ang atong mga bida nga maoy tinubdan sa ilang gahum. Si Enrique (earth), Liza (hangin), Matteo (kalayo), Makisig (kahoy) ug Sofia (tubig).
Makauban sa atong mga bida silang Maricar Reyes, Precious Lara Quigaman, Dimples Romana, Ana Abad Santos, Ruffa Mae Quinto, Diether Ocampo, Robert Sena, Lito Pimentel, Rayver Cruz, Enzo Pineda, Christian Vasquez ug may espesyal nga partisipasyon silang Bela Padilla, Ian Veneration ug Albert Martinez.
Sa Kapamilya network kini nato makita matag gabii, nga maorag hulip ni sa “La Luna Sangre” nga matapos na karong buwana, ay’g saba!