BUN-OG sa kalawasan ang naangkon sa usa ka dalaga human kulataha sa kanhi nga uyab samtang pauli na kini gikan sa trabahoan niadtong Sabado mga alas 10:00 sa gabii sa Barangay 34, Dakbayan sa Cagayan de Oro.

Gibira ug gisumbag ni Noli Esclamado, nga taga Balingiao, Camaman-an, ang biktima nga giilang si Jenny (dili tinuod nga pangalan), dalaga ug lumulupyo sa Hayes Street, Pinikitan ning dakbayan, sa wala ikabutyag nga rason.

Subay sa report sa buhatan sa Police Station 2 (PS2) sa Cogon, nasayran nga samtang nigawas na ang biktima gikan sa trabahoan sa usa sa dakong mall ning siyudad, wala kini kasayoran nga nagpaabot kaniya ang suspetsado.

Gibunlot ug gisumbag sa agtang, sa tuo nga bahin sa kilid ug sa likod, hinungdan nga nakaangkon kini og gasgas ug bun-og sa kalawasan.

Gidala pa sa maong suspetsaddo ang mga gamit sa biktima sama sa cellphone, ATM, ID, yabe sa panimalay ug kwarta ug maayo na lang nakadagan ang biktima. (KCS)