GIPAMUSIL ug gipanigbas ang inahan ug anak nga napalgang wala nay kinabuhi niadtong Domingo mga alas 9:00 sa gabii sa Maitom, Upper Puerto, Dakbayan sa Cagayan de Oro.

Patay sila Novata Aringay, care taker sa yuta nga ilang gipuy-an ug anak niini nga mao si Edwin Aringay, pulos lumolupyo sa maong dapit.

Sa pakighinabi sa Sun.Star Superbalita ngadto kang Senior Police Officer1 Ronelo Ubas, Chief Investigator sa Police Station 6 sa Puerto nasayran nga walay nakitang mga basiyo sa bala ug mahait nga hinagiban sa crime scene.

Sa inisyal nga imbestigasyon, dili moubos sa upat ka mga suspetsado ang responsable sa niluog nga pagpatay sa inahan ug anak kinsa nakaangkon og grabe nga samad tinigbasan.

Gituohan nga gidala pa sa mga suspek ang motorsiklo nga gimaneho ni Edwin nga usa ka Kymco nga nagdala sa plaka 8396.

Nasayran nga gikan ang mga biktima sa Balubal kay nagkuha og lubi aron ibaligya apan pag-abot sa maong dapit natigayon na ang maong insidente diin gituohang giatangan o gisundan ng daan ang mga biktima.

Girespondehan usab sa Scene of the Crime (SOCO) Northern Mindanao ang maong insidente sa pagpangulo ni Dr. Christian Caballes ug sa inisyal nga imbestigasiyon migawas nga pareho nga nakaangkon ang mga biktima og samad pinusilan sa dughan ug tinigbasan sa dagway hinungdan nga gituohang hinungdan sa ilang kamatayon.

Gitutokan sa kapolisan ang tanang anggulo aron masuta ang motibo sa pagpatay sa mga biktima kinsa gituohang aduna'y dakong kasuko tungod kay gawas sa gipamusil gipangtigbas pa kini.

Gawas sa carnapping wala usab gisirado sa kapolisan ang anggulo nga posibleng tungod sa bikil sa yuta usab ang motibo sa maong krimen human usa sa mga pamilya sa biktima ang kombinsido nga bangi gyud sa yuta ang hinungdan.

Ang patay nga lawas sa mga biktima kasamtangang anaa pa sa Bollozos Funeral Parlor sa Bulua.