NIMARTSA na ang Jashel Chloe Big Truckers ngadto sa final human gitagak nila ang Maybank Tigers, 122-89, sa Game 2 atol sa 7th Hazard Inter-company Basketball Tournament best-of-three semifinal niadtong Miyerkules sa gabie, Agusto 2, sa NHA covered courts, Kauswagan.

Samtang, gipugos sa Jed Jared Truckers nga magpabiling buhi human gitabla nila ang siryi agi sa 77-72 nga eskapo batok sa Desmark Corporation.

Nibira og dako si Andot Balsarza nga adunay 25 puntos sa kadaogan sa Jashel Big Truckers, samtang sila Dale Pandita ug Joresh Magsayo nihatag og 21 ug 18 puntos, sunod-sunod.

Hugot nga panagsangka pirmiro tali sa Jashel ug Tigers sa first quarter diin nahuman sa 32-25 labaw sa Big Truckers.

Apan, nagkalayo ang Jashel sa second quarter human mibinat sila og 27 puntos nga labaw.

Giinat pa nila og ayo ngadto sa ilang kinataas nga labaw nga 35 puntod paingon sa ika-upat ug kataposang quarter.

Maatbang sa Jashel ang modaug tali sa Desmark ug Jed Jared diin mopaingon sila og kulbahinam nga tinagakay sa game 3.

Natabla sa Jed Jared ang siryi ngadto sa 1-1 human makalingkawas sila agi sa 77-72 nga daug batok sa Desmark sa Game 2.

Nihuman si Lumba og 20 puntos, samtang niabag sab sila Perodes ug Jay Vallecer og 15 ug 14 puntos, sunodsunod.

Apan, nibida sila Perodes ug Vallecer sa himatyanon nga minuto human gipalumos nila ang ilang duha ka tres aron masilyo ang daig sa Jed Jared.

Magbinal-anay Desmark ug Jed Jared karong gabie sa kinsa kanila ang moabante sa final btok sa naghulat nga Jashel.