ANG Bureau of Fire Protection (BFP)-Davao nagpahimangno sa katawhan nga seguraduhong luwas ang balay una kini biyaan kung mangadto sa mga sementeryo.

Si Fire Superintendent Honey Fritz Alagano, fire marshal sa Davao City Fire District, nagbutyag niini atol sa ilang "Safety Tips sa Undas 2017" kagahapon sa buntag.

Sa pakighinabi sa SunStar SuperBalita, gibutyag ni Alagano nga mas maayo unahon ang pag-igmat gumikan ang disgrasya sa sunog daw sama lamang sa usa ka pagpamilok.

"Seguraduhon nato nga anaa sa safety ang sud sa atong balay una nato biyaan, aron malikayan ang sunog," sulti ni Alagano.

Sumala ni Alagano nga seguraduhon nga una biyaan ang panimalay, naibot ang tanang mga gipangsaksak sa kuryente ug kung mamahimo palungon ang main switch niini.

"See to it nga na-check nato ang atong mga electrical connection, pag-ibton nato una ta mobiya sa atong panimalay," dugang sulti sa opsiyal kinsa dunay dugang pahimangno nga mas maayo sab nga ipamalihog og pagtan-aw sa silingan ang balay.

Giawhag sab sa kabomberohan nga mas maayong magbaton og fire extinguisher ang tagbalay o kaha dunay kanunay'ng andam nga tubig diin kinahanglan nga sirad-an lang kini aron di kapangitlogan sa lamok.

Sugod kagahapon, gipang-deploy na sa mga dagkong sementeryo ning siyudad ang pipila ka personahe sa kabomberohan uban sa mga fire trucks aron mao unya ang gilayong moresponde ugaling dunay matigayon nga sunog sa mga sementeryo gumikan sa mga kandila.

Nagpasalig sab ang kabomberohan sa dakbayan nga nga dunay bastante nga mga personahe ug mga fire trucks ang naka-standby uban sa mga fire volunteers.

Subay sa datos sa BFD-Davao, miubos ang natalang sunog karong tuiga, itandi sa milabay nga tuig, apan mas dako ang danyos karong tuiga gumikan sagad sa mga nangasunog mga dagkong establisyemento.