WALA tugta sa Lagonglong ug Magsaysay nga makadaug ang duha pa ka pambato sa munisipyo sa Binuangan atol sa 2017 Kuyamis Sportsfest Basketball Tournament niadtong Sabado, Agusto 5, sa Binuangan municipal park.

Gilubong sa Magsaysay ang Binuangan agi sa 118-86 nga daug atol sa ilang panagsangka sa open division.

Nibira si P Mendoza og 29 puntos alang mangulo sa Magsaysay, samtang niabag sab si Real Butal og 18 puntos.

Dominante ra kaayo ang Magsaysay sa tanan angulo batok sa host Binuangan.

Nibira sila og komportableng labaw nga 17 puntos pagsirado sa first quarter gibinat pa paingon sa 60-42 paghuman sa unang half.

Gikan ana, wala matay-og ang labaw sa Magsaysay ug nasamotan pa nila pagbinat sa ilang kinataas nga labaw nga 33 puntos paingon sa kadaogan.

Giparot sa Lagonglong ang Binuangan, 81-61, atol sa 18-under boys.

Nihuman si Caezar Bacan og 32 puntos, samtang niabag sila Roy Gadot ug Roe Tabamo og 13 ug 12 puntos, sunodsunod.

Dikit ang panagsangka sa duha sa unang tulo ka quarters sa dula, apan didto nagdaug sa kataposang quarter sa dula.

Nakakita og buylo ang Lagonglong pagbinat og komportableng labaw sugod niadtong natawagan ang duha ka players sa Binuangan og duha ka technical fouls.

Natagaan ang Lagonglong og upat ka freethrows ug pulos nasulod hinungdan nakapahuyang sa Binuangan.