MR. Confident ang tawag kaniya.

Giharos ni Rey Laput ang tanan niyang naagian nga kaatbang aron angkonon ang titulo sa 1st season Explore MisOr Rapid Chess Tournament nga nahuman niadtong Sabado didto sa Capitol Chess Club.

Niposti og perpektong pito ka puntos ang 33-anyos nga Laput sulod sa pito ka round human mapilde niya si Abdul Halil Abdullah sa usa ka English Opening nga panagkombati sa kataposang round.

Bisan tuod sa hulgang hugonhugon nga adunay Mers nga kaso diha sa Northern Mindanao Medical Center, dili mapugngan ang gakalayo nga mga tirada ni Laput bisan tuod nagsulay kini paggamit og surgery mask.

Gani, pipila sa mga entrante nagduhaduha og apil sa torneyo bisan tuod nagpaghayag na ang Department of Health duha pa ka adlaw sa wala pa ang torneyo nga negatibo ang hulga sa MERS.

Duha ka mga batanon ang nagsunod sa ikaduha ug ikatulo nga pwesto nga sila Othniel Adrian Yulo ug Aldin Ronulfo Ranario, sunodsunod.

Napilde ni Yulo si Romeo Canino sa board two, samtang nidaog si Ranario batok kang Diosdado Lapiceros sa board three.

Sila Renan Cantilado ug Noynoy Canlas nahulog sa ikaupat ug ikalima nga pwesto, sunod-sunod.

Ang 7-anyos nga si Ruelle Canino ang niangkon sa top lady miposti og upat ka puntos.