TAGBILARAN CITY - Nahanaw sa usa ka pamilok ang kwarta nga gikuptan sa usa ka lending collector dihang giingong duha ka armadong lalaki ang mitulis niini niadtong Pebrero 27 sa Barangay Dampas dihang ang kolektor padung na unta mo-remit sa iyang koleksyon gikan sa mga kliyente. Mokabat sa P68,000 ang kwarta nga nakuha sa mga wa pa matumbok nga tulisan. Giila ang biktima nga Victim Riboden Silva, 30, taga Barangay Bool ug empleyado sa Lucky Day Lending nga nahimutang sa may Belderol St., dakbayan sa Tagbilaran. Sa pakisusi sa kapulisan, sakay si Silva sa iyang motorsiklo dihang ang duha ka armadong lalaki miatang sa iyang giagi-an ug gitulis.