DIGOS CITY -- Nasikop sa mga operatiba sa Criminal Investigation and Detection Group (CIDG) ang gitudlong lider sa Morata Robbery Group nga naglihok sa Davao del Sur, alas 5:05 sa hapon, Sabado.

Si Chief Inspector Dave Mejia, hepe sa CIDG-Davao del Sur, nagbutyag nga ang suspek nga si Jesus Morata, 66, way trabaho ug molupyo sa dalang 1st Crumb ning dakbayan.

Matud ni Mejia nga si Morata adunay warrant of arrest tungod sa kasong robbery. Nanukad ang orden de aresto sa Regional Trial Court (RTC) Branch 34 ubos sa sala ni Presiding Judge Dax Gonzaga Xenos sa Panabo City.

Nasayran nga nasiplatan sa kapulisan ang suspek samtang didto sa dalang Aurora sa Barangay Zone 1, hinungdan nga daling gisilbi ang orden de aresto.

Gidason ni Mejia nga ang suspek nagpaluyo sa mga robbery sa dakbayan ug ubang kalungsuran sa Davao del Sur.

Anaa na sa kustodiya sa CIDG ang dinakpan samtang naghuwat sila sa mosunod nga mando sa korte. (Orlando B. Dinoy)