GUBA ang daghan nga mga kabalayan sa kusog nga linog nga mitay-og niadtong Miyerkules, Abril 12, alas 5:20 sa buntag diin sentro mao ang dakbayan sa Wao, Lanao del Sur.

Basi sa talaan sa Wao Municipal Risk Reduction Management Council pinaagi sa head nga si Francis Garcia gibutyag niini nga sa mokabat 26 ka mga barangay, upat pa lamang ang ilang na-monitor ug 30 sa puloy-anan ang ilang natalang naguba duha niini ang mosque, pipila ka establismento ug usa ka eskwelahan.

Tungod sab kay niliki ang bungbong sa hospital sa dapit gipagawas ang mga pasyente sa ospital ug didto usa gipahimutang sa gawas nga bahin ug gibutangan na lamang og tent.

Upat sab ka inches ang kalapdon sa pagkasiak sa dalan ug adunay mga parte sa dakbayan ang nagdahili ang yuta ug maayo na lamang walay residente nga mga namuyo.

Samtang ang lungsod sa Kalilangan, Bukidnon lakip sa apektado diin aduna gihapon natala nga naguba nga mga panimalay. Hinuon gipaniguro sa ilang kagamhanan nga local nga dili apektado ang ilang kuryente ug tubig.

Si Philippine Institute of Volcanology and Seismology Regional Director Marcial Labininay nibutyag nga magnitude 6 ang nasinating pagtay-og diin ang epicenter mao ang lungsod sa Wao, Lanao del Sur.

Gibutyag niini nga una nilang gideklarar nga 5.5 magnitude ug epicenter sa dakbayan sa Kalilangan apan gipasabot niining pwede pa kining mausab ug sa mga misulod nga data miresulta nga sa Wao ang epicenter niini.

Nabati usab ang pagtay-og sa diin Intensity IV sa Davao City, Cagayan de Oro City, Cotabato City, ug Gingoog City, Misamis Oriental.

Gipahibalo sab ni Labininay nga sa kusog nga pagtay-og lauman ang sunod-sunod nga aftershock ug dugang mga damyos.

Gipasabot sab niini nga walay makaprediktar og linog hinungdan angayan magbinantayon ug mangandam ang tanan.