MANGHUD gipusil patay sa iyang maguwang gumikan lang sa selos diin nagtuo nga may relasyon kini sa iyang asawa. Kini nahitabo niadtong Lunes sa alas 8:00 sa gabii didto sa Barangay General Climaco, dakbayan sa Toledo.

Si Bryn Venanel, 23, ulitawo ug construction worker dead-on-arrival nga nahidangat sa Toledo District Hospital human nakaangkog samad pinusilan sa likod sa ulo ug sa lawas. Si Abondio Venanel, 43, minyo nga construction worker usab maoy suspek sa krimen ug milayas gilayon human sa pagpamusil.

Matod ni PO3 Carlos Baluado, desk officer sa Toledo Police Station nga ang suspetsado naburyong human nakadungog ug mga tabi-tabi nga ang iyang asawang si Anita, uyab sa iyang manghod. Ang biktima nagduwa-duwag sa iyang selpon nga naglingkod sa may purtahan sa ilang panimalay ug sa dihang naabot ang suspetsado gipusil niini makaduha kahigayon. Sa wa pa mahitabo ang krimen ang asawa sab niining si Anita, gikulata sa suspek ug gisukmatan kabahin sa relasyon niya sa iyang manghud. Si SPO2 Benedicto Bobilles, imbestigador sa Toledo Police Station nga nahinabi sa Sun.Star Superbalita nagkanayon nga “Love Triangle” ang motibo sa krimen.