DEAR Dr. Fritz,
Maayong adlaw kanimo, dok. Ako diay si Liwayway, dok. Nisuwat gyud ko nimo kay naglibog ko sa gihimo sa akong 5-anyos nga anak nga lalaki. Ako kini siyang nasakpan nga nagadula-dula sa iyang kinatawo ug hangtud nga nag-masturbate na kini siya.
Nakugang gyud ko, dok, kay mora'g wala ko katuo sa akong nakit-an nga wala gyud tawon ko nakatingog. Nabalaka gyud ko ning akong namatikdan sa akong anak, dok.
Sa imong tan-aw, dok, normal lang ba ni sa bata nga mag-masturbate? Ngano man sad nga mag-masturbate ang usa ka bata? Sa mga dagko, dok, normal lang ba gyud ning masturbation? Ngano man sad nga naga-masturbate ang mga dagko? Dili ba kini makadaut?
Magapaabot ko sa imong tubag. Daghang salamat sa imong pagtagad sa akong sulat.
Liwayway of Buhangin
***
Dear Liwayway of Buhangin,
Nakasabot ko sa imong gibati ilabi na nga gipadako ka sa usa ka pamilya nga ang konsepto sa sekswalidad kadtong istrikto nga tradisyonal pa.
Ang maskin kinsa naga-masturbate, madato, pobre, tiguwang, bata, babaye, o lalaki. Kining masturbation kasagaran kini nga pamatasan, maskin na gani sa mga tawo nga aduna nay kapikas sa ilang kinabuhi. Gani, sa usa ka nasudnon nga pagtuon, 95 porsyento sa mga lalaki ug 89 porsyento sa mga babaye nitaho nga sila usab naga-masturbate. Ang masturbation ang una nga seksuwal nga ginahimo nga nasinati sa kasagaran nga mga kababainhan ug kalalakin-an.
Sa mga bata, susama sa imong anak nga lalaki, ang masturbation, normal ni nga parte sa pag-usisa niya sa iyang lawas. Ug ang masturbation sa mga bata, wala kini halo nga malisya, o mga sensuwalidad, kung dili kalingaw lamang ang ilang gibati sa ilang ginahimo.
Mao nga ayaw kabalaka kung nasakpan man nimo ang imong anak nga nag-masturbate, normal lang na. Gani, kasagaran sa mga tawo nagapadayon nga mag-masturbate hangtud kini sila mahingkod, ug daghan kanila ang mohimo niini hangtud sila adunay kinabuhi.
Hinumdomi, kitang tanan, mga binuhat nga seksuwal-gikan sa pagkahimugso hangtud nga sa atong pagbalik unya sa yuta.
Apan usa kita magpadayon sa unahan, tungod kay taas-taas pa man ang atong pagahisgutan mahitungod niining imong sitwasiyon, tugoti ako nga ato kini nga padayunon og pagtuki sa mga sunod nga edisyon niining atong patik.
Hangtud sa sunod!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)