ORMOC CITY- Nakadawat na sa ilang Productivity Enhancement Incentive (PEI) ang mga kawani sa City Hall.
Matod ni Eufemia Davaras sa Human Resources Office nga 538 ka mga regular ug 486 ka mga casual ang kwalipikadong nakadawat sa PEI.
“Depende man na sa ilang sweldo, kon pila ilang sweldo mao sab ang ilang PEI,” matod ni Davaras.
Mokabat sa P10 milyones ang kinatibuk-ang pundo ang gigahin sa siyudad alang sa PEI diin gikuha kini sa salary saving sa mga bakanteng posisyon.
Nanawagan og usbaw sa suholan ang pipila ka kawani.
Alang sa regular nga kawani nga si Victoriano Sandoval, kuwang pa ang iyang P9,000 kapin nga suholan alang sa iyang pamilya.
“Wa na gyod mi pangsuroy ani, unya ibanan pa sa mga utang, wa na gyod mi madawdaw,” matod ni Sandoval.
Moabot sa 33 ka tuig na nga nag serbisyo sa kagamhanan si Sandoval ug tulo ka tuig gikan karon, moretiro na siya.
Busa nanghinaot si Sandoval nga dunggon sa kagamhanan ang ilang panawagan sa usbaw sa suholan.
Sa paglingkod ni Ormoc City Mayor Edward Codilla, nitungtong na sa P260 matag adlaw ang suholan sa mga job order.