WA pa gani masulbad ang duha ka sunodsunod nga mga tulis sa miaging semana, mga tulisan nangigo na sab og ahente niadtong Lunes sa alas 3 sa hapon sa Barangay Buanoy, lungsud sa Balamban.

Si Joseph dela Rama, 31, ulitawo, taga Alaska Barangay Mambaling, dakbayan sa Sugbo, ahente sa bino, way nahimo dihang gitulis sa tulo ka mga lalake nga nagsakay sa duha ka mga motorsiklo.

Si PO1 Monchito Clarin, desk officer sa Balamban Police Station nga nahinabi sa Sun.Star Superbalita, nagkanayon nga ang biktima nag-deliver sa mga baligyang bino sa usa ka tindahan.

Human mibalik siya sa agi aron mosakay sa van, ning-abot ang mga tulisan, ang duha nag-angkasanay sa kolor itom nga XRM, samtang ang usa sa nag-inusarang nagmaneho sa kolor puti ug itom nga motorsiklo.

Ang usa sa mga suspek ningkanaug sa motorsiklo.

Ang duha nagsilbing back-up dihang ningdeklarar og tulis ug gidala ang P10,000 nga halin.

Ang mga tulisan paspas nga ningpadagan sa motorsiklo paingon sa dakbayan sa Toledo hinungdan nga wa na maabti sa mga pulis.

Sa miaging semana, lima ka mga tulis ang sunosunod nga nahitabo nga naggintang lang og mga minutos.

Duha sa mga tulis nahitabo sa Balamban.