USA ka sorpresang Oplan Galugad ang gihimo sa prisuhan sa Misamis Oriental Provincial Jail and Rehab (MOPJ) niaging semana diha sa may dalan Corrales St.-Luna ning siyudad sa Cagayan de Oro.

Ang inspeksyon gihimo sa mga personahe sa Cagayan de Oro City Police Office (Cocpo).

Gibutyag sa jail warden nga mao si Dominador Tagarda nga lakip sa gisusi sa kapolisan kon wala bay gisuksok sa ilang kalawasan ang mga piniriso.

Atol sa pagalugad kanila adunay nakuha nga mga gidili sama sa rugby, gunting, stainless nga kutsara, sigarilyo, gabas, posporo, baraha, nail cutter, cellphone ug headset diin gipasabot sa pipila nga gigamit kini sa ilang gipanghimo nga christmas lantern.

Hinuon walay nakuha nga sama sa ginadili nga druga.

Matud ni Tagarda nga malampuson ang kalihokan gumikan kay nikooperar ang mga piniriso.

Daw kabahin sab kini sa mando ni Misamis Oriental Yevgeny Vincente Emano nga inpeksyunon matag karon ug unya ang prisuhan kay alang raman usab kini sa ilang seguridad ug kaayohan.