"MAS maayong moserender na lang sila."

Kini ang gibutyag sa bag-o lang nilingkod nga director sa Police Regional Office-Northern Mindanao nga mao si Police Chief Superintendent Agripino Javier hulip ni Police Chief Superintendent Noel Constantino atol sa turnover of command niadtong Martes sa Camp Alagar, Lapasan, siyudad sa Cagayan de Oro.

Kahinumduman nga ginganlan ni Presidente Rodrigo Duterte ang pipila ka giingong mga narco-politician diin nalakip ang pangalan ni kanhi Iligan Mayor Lawrence Cruz ug kanhi Initao Mayor Willie Tan.

Gipasabot ni Javier nga dili basta-basta mag ngalan og tawo si Duterte kung wala kini lawom nga basihanan ug tungod niini nga mas maayong mosurender na lamang.

Kahinumduman, suk-anon nga namahayag si Cruz nga kung kinsa man ang nagpasipsip sa Presidente ug nagdaot sa iyang pangalan ang manubag gyod niini tungod kay wala siyay kalambigitan sa ginadili nga druga ug kung gilambigit man siya niini, kini tungod sa pulitikanhong katuyoan.

Sa iyang bahin sab ni kanhi Initao Mayor Willie Tan, gibutyag niini nga sayod ang katawhan sa iyang lungsod nga wala siyag gikalambigitan nga ginadili nga kalihokan.

Gani daw apektado ang iyang kabanay sa pamahayag ni Presidente Duterte. Bout usab niining limpyohon iyang pangalan.

Gipasalig usab ni Javier nga siya ang magpadayon sa nasugdan ni Constantino nga pakigbisogan ang giyera batok druga denhi sa rehiyon labina ang Northern Mindanao, usa sa nag-unang rehiyon nga daghan og accomplishment kung kini ang hisgotan.

Si Javier kanhi nadestino sa Autonomous Region in Muslim Mindanao.