PATAY ang manager samtang naluwas ang iyang drayber human mapasok ilawom sa prime mover nga nagguyod ug trailer ang ilang gisakyan nga motorsiklo, pasado alas singko ang takna sa milabayng hapon sa dalan MJ Cuenco, dakbayan sa Sugbo.

Mao na lay namat-an sa drayber nga diha na siya ilawom sa trailer nataliwad-an sa duha ka dagkong ligid ug ang iyang manager uban sa motorsiklo nailawman sa ligid.

Ang patay na nga nadangat sa tambalanan giila nga si Mary Jane Dosdos, 36, minyo nga taga Wireless, Tipolo siyudad sa Mandaue ug sales manager sa Office Box Corp.

Ang biktima sakay sa motorsiklo nga may plate number GA-29866 nga gimaniho ni Jayson Redongo, 25, taga Eulalia St., Maria Luiza Estate Park, usa ka computer technician/driver sa kompaniya.

Nakaligis kanila ang truck nga may plate number nga GVY-330 nga gimaniho ni Eduardo Nillas sa Subangdaku, siyudad sa Mandaue.

Si Redongo, sa imbestigasyon sa Traffic Division, nibutyag nga gikan sila nga nagpa-pirma sa ilang kliyente sa MJ Cuenco ug paingon na unta sila mamauli balik sa opisina.

Iyang gitaparan ang trak nga gimaniho ni Nillas paatubang paingon sa Mabolo, apan aksidente nga nasabud ang manubela sa iyang gimaniho nga motorsiklo, hangtud nga wa na siya maka-control sa dagan.

“Pagka-igo sa akong manubela, mura mi ug gisuyop paingon ilawom sa trak, wa na ko makamatikod, hangtod nga namat-an na lang nako, diha nako ilawom sa truck natunga-tunga sa dagkong ligid,” matod pa ni Redongo.

Mi-responde ang ambulansya ug daling gidala si Dosdos sa ospital, apan gi-deklarar kini nga dead-on-arrival.

Samtang ang driver sa trak miingon nga diha na siya makabantay sa aksidente human misyagit ang mga tawo.